東尼 VS 黃金

很久沒有看東尼了，最近看，別有一番滋味在心頭，特別是成為金甲蟲之後！東尼有好多捧場客，我曾經亦是一份子，更買了他的著作，很多人亦跟我一樣，他的名言包括長渣必勝，重長遠增長而不要短期炒作，因為股票的復息增長可以非常驚人云云，其壹周刊專欄所設的一百萬投資基金的表現至今回報教人刮目相看。

-----------------------------------------------------------------

基金於1999年6月設立，至2010年9月2日那期《壹周刊》共升值502%(本金+股息+再投資)，成績非常不錯。不過，對比一下黃金，其實亦差不多，1999年6月-8月的金價徘徊在250左右，6月時平均是251，8月最低見過240左右，若當時用100萬投資黃金，今日有498%至520%增長(以這兩星期$1250金價計)，成績不相拍仲。

----------------------------------------------------------------

十一年來，東尼花在閱讀公司年報及揀股上不知花了多少心血，才能有這樣成績，但黃金全球只有一種，無需揀，無需讀年報，只需買入並持有至今，成績已跟東尼一樣，甚至如果是在低位$240買入，更會跑贏東尼。計我話，長渣必勝亦可用於黃金，且比東尼要渣得舒服好多！(嘻嘻)

---------------------------------------------------------------

ps：今人常說黃金最大問題是無利息，但東尼的投資組合沒有拿走過一分一毫利息，全計在總額內，有的就用於再投資，結果亦只是與沒有利息的黃金打成平手。沒有利息真是缺點嗎？

難以估計通賬軌跡之：不蛋定

記得好耐以前，曾與好多網友討論通賬，有人只看政府公佈之CPI，但CPI已撇除了好多野，我就認為最實際就係看看身邊的各種物價走勢，像雞蛋，原來又升左唔少，特別係大陸，令到好多香港商人，如蛋卷製造商要轉用泰國蛋。最近大陸流行一句野，如果想笑人「唔淡定」，就改成「不蛋淡」，因為雞蛋價格自六月起，日日都唔同，今日賣$6.2，聽日就變成本8.2。

--------------------------------------------------------------

點解大陸的蛋會升咁多呢？通賬就係咁，好多野令你估都估唔到。原來大陸各地政府一向有監控民間物價，唔俾商戶亂加價影響民生，商品交易市場亦被看得很緊，唔俾人亂炒，本來雞蛋價格一路都穩定。點知因為粟米及小麥等飼料近呢一年不斷漲價，令到生產雞蛋的成本仲貴過蛋價，即係好似黃金市場出現過的「倒價」，係價格冇得加，養殖成本又高過蛋價的情況下，農民為免損失，於是減少或停止供應雞蛋，令供應減少，而又因為雞蛋保存期較短，所以街市的販商及批發商好難一早入定大批蛋，結果一層推一層，最後雞蛋價格還是私下被炒起，出現日日唔同蛋價情況。雞蛋價格極之「不蛋定」。

--------------------------------------------------------------

香港而家仲可以用住泰國蛋或美國蛋，但繼美國蛋出現三文氏菌後，泰國蛋亦可能係不久將來被炒高，香港的腿蛋治、餐蛋麵、全蛋麵、蛋卷、雞蛋仔........應該好快會加價。

連大陸呢種政府主導經濟發展的國家都控制唔到商品價格，通賬要來時，話之你九招十二式，定係四招十三式，都一樣無用。

--------------------------------------------------------------

PS：我幫襯一間理髮店已幫襯了十七年，店開係一個小閣樓，有一條好窄的樓梯行上去，樓底又低，呢d舖位真係唔知可以做乜生意？所以十幾年來，業主一路冇加租，理髮店老闆亦好安心做生意，準時交租，與業主保持良好關係，點知最近業主突然要加租50%，結果理髮店被迫搬舖。通賬係乜？身邊就可發現。

黃金對分散投資的重要

早前已講過黃金在配置資產的重要性，不過就冇推出實質數據。今日信報畢老林提供了相關的數據，佢指出過去一年，美股標普500與各行各業ETF的相關系數有0.65-0.95以上，至於匯市，除了日元外，相關系數亦有0.6-0.8，債市有6.1，在云云資產中，最低係黃金與白銀，過去一年，相關系數只有0.45，最低跌過去負0.30。即係話在各種資產類別中，股債匯的相關性都非常大，較大機會同升同跌，只有黃金白銀例外。與股市的關係性較小。

唔使多講，想分散投資股票的風險，並唔係買多幾種唔同的股票，亦唔係買外幣及債券，而係買黃金與白銀！可惜，冇投資顧問會咁樣教人！唉............................

利昌終於有銀賣！想買趁手！

最近小兒剛出生，沒太多時間看資料，今日得閒些少，知道利昌有銀賣，拿拿買番些少！

產品是利昌自已出品，有利昌的帆船Logo及三個999，不過就冇其他資料，當然冇銀幣咁有國際認受性，但老字號出品，應有保證！放售可以回利昌放，但估計中銀暫時唔收！

銀的重量有幾種，四兩銀條，一兩銀粒，另有四公斤銀磚，價格跟金銀業貿易場價格，我買入價是$181/兩，另加火耗，約十幾蚊。

利昌做買賣都幾嚴謹，雖然已有晒重量，但交易時會再用秤秤一秤俾個客睇，再計番交易價。

買果陣同櫃面阿叔傾兩句，從佢口中證實中銀已不再售賣長城銀條。

利昌金舖電話：2521 3106

再次回購國債

美國紐約聯儲銀行公布聯儲局購買國債計劃詳情，會於下星期二開始至9月13日的4個星期內，分9次購入總值180億美元金額等同所持有的到期兩房債券和按揭扺押證券回籠的本金。

首批買入的是2年期國債，而在8月31日一次就會買入30年期的通脹掛鉤債券。聯儲局於較早前宣布新措施，將到期的兩房債券和按揭抵押證券回籠的本金再投資到國債，主要會購買2至10年期的國債，會在每月的月中公布買入的國債數額，以及預期之後1個月購買國債的安排。

當局的目標是要將資產負債表規模維持在大約20,500億美元，被市場視為量化寬鬆政策的修訂版。(資料來源：頭條日報)

大家仲記唔記得由年頭開始，不斷吹風話退市，結果呢.......
原來唔單止唔退市，仲要將回籠本金再回購國債！最可圈可點係8月31日，會買通賬掛鉤債券，即係連佢地自已都覺得會通賬！

勁搞笑廣告：神奇手推車與超人護衛

8月2日，在信報睇到呢個廣告，係本地唯一一隻黃金ETF賣既全版廣告，聲言會幫客人買金放入金庫云云，買佢地既股票如同買實金。

是龍是鳳？我地無謂猜測，不過一睇到幅廣告相，我就想笑出黎，相中護衛推的是國際標準交易金磚，一塊重400安士，即係25磅，由上數到下，共有255塊，即係255 x 25磅，共6375磅，換句話說，呢一車金差不多有3噸重，約等於一隻成年非洲母象。一個護衛竟可以推住呢3噸黃金入金庫，仲要係用一架普通手推車，簡直好笑到無話可說。

錯錯錯！我地唔應該笑人，人地財雄勢大，絕對有可能買到一架神奇手推車，及請到超人做護衛，實在係我地太多疑！

PS：香港政府有2噸多一點的黃金儲備，即係比呢架車上的金仲要少，但卻係代表700萬人的黃金儲備！

高科技假金飾湧港 金行押店中招 商會發通告警告金銀同業

【本報訊】俗語說「真金不怕洪爐火」，但金價高企，本港近期湧現大批疑以高科技製造、冒充 999.9金的假金飾。假金實際成色只有五至九成，騙徒將它們拿到全港多區的金舖變賣，成功騙倒不少珠寶金行的老行尊，據悉已有大型連鎖珠寶金行中招。九龍珠石玉器金銀首飾業商會罕有發出通告，提醒業界提防。有業界人士估計，行內損失以千萬元計；有金行已暫停收購來歷不明的金飾，避免損失。

上月 24日，九龍珠石玉器金銀首飾業商會向會員發出通告，指近日不斷收到會員通報，「有不明來歷印有 999.9（字印模糊）的金飾，在港、九、新界各地區的金舖變賣，經檢測成色十分參差，大約是五成至九成之間」。通告指出，問題金飾主要分「合金類」和「夾心類」。
合金類用鑄模方式製造，款式有珠筒形或雙面仿美裝頸鏈、方牌、鑄模花手鏈等，內含銥、鋨、釕、鋅、銅等金屬元素，特點是用火燒紅後也不變色，但質地十分堅硬。夾心類主要有銼平鏈、側身鏈、珍珠鏈及給模墜等，面層是足金，中心卻夾有銀片或鋼沙；商會建議，用拗或扭剪等方法小心測試，以辨真假。

「用火燒都唔會變色」

商會警告會員，黃金有價，市面上「有人挖空心思，做假『搵食』」，應通知前線員工收金飾時要小心檢測，免招損失。通告更附上問題金飾的相片，供會員參考。
有業界人士透露，約一個多月前市面湧現這批疑以高科技打造的假金飾，最初中招的是多間位於銅鑼灣購物區的知名連鎖珠寶金行，其後陸續有其他地區的金行中招。以往行內發現的假金飾質素差劣，一般用肉眼或試金石等可分辨真假，但今次質素之高及數量之多，均為近年罕見；假金以足金滲入雜質，再以高超技術製成，顏色、密度均與 999.9金一樣，「滲入銥呢種化學元素，就算用火去燒都唔會變色，外表又用足金包住，用試金石去磨，都未必察覺到，好多老行尊都被呃，除非拎去化驗所去化驗先得，起碼要成個星期時間」。

業界損失以千萬元計

據稱，變賣假金的匪徒沒有特定打扮，「有啲似內地人，有啲似東南亞華僑，總之唔能夠單憑外表去分辨」。業界人士解釋，行內作風保守，為顧全面子，中招的金行均沒有報警；但他估計，業界損失至少過千萬元。眼見越來越多同行中招，商會惟有發出通告，公開提醒同行。部份金行已盡量不收取外來金飾，避免損失。澳門業界也聽聞事件，擔心成為下一目標。
該業界人士又稱，今次大型連鎖珠寶金行損失最嚴重，相信與它們資金充裕，以及前線人員經驗不足有關，「大金行有大把現金，可即時進行交易，匪徒容易將啲貨脫手，而且佢哋員工人數多，未必個個經驗足夠，佢哋又要跑數，當然希望做多啲生意」。
消息又稱，除珠寶金行外，本港多間當舖亦中招，「當舖更易中招，因為佢哋唔能夠第一時間去檢測，要等個客斷當之後，拎去變賣才知道」。