白銀市場將會率先爆

先多謝金多錄的分享，白銀市場的機會的確比黃金更勁，這是因為白銀長期被人為壓得太低價，造成了回收停頓的局面，基本上是不斷地消耗，而家只係等幾時爆。

-

上星期我去旺角萬安行買手連，就跟老闆 (相中穿迷彩者) 講起這件事。老闆講，以前 (七八十年代) 佢地店舖是會回收銀器的，就好似而家買金一樣，有買入賣出價，店後面還有個工場，可以熔銀，因為當時銀價相對租金、人工、燃料仍然算合理，買賣的差價扣除火耗後，銀器店仍然有肉食，但八十年初之後就不可以了，因為當銀價每安士只係$40-$60港元，買出買入差價只係幾蚊，儲存+火耗+人工+租金比差價高出不知幾多，連銀價都不能抵消，即係話你送塊銀俾佢，佢叫人熔左佢都仲要貴過白銀本身的價值，再搵人重新做一件首飾，成本就遠遠超過銀價了，因為同樣是一件首飾，用金做同用銀做，手工費相差無幾，結果，銀器店唯有停止回收白銀，否則就要倒蝕。

-

結果做成乜野現象呢？就係過去幾十年，白銀都是有出冇入，佢只會從供應商買銀製品來賣，而唔會收銀器循環再用。所以大部份人去買銀器，買的都係租金、人工、手工費，反而白銀的成本好低，所有銀器亦唔會跟銀價定。

-

除了飾物範疇，其他工業用途亦一樣，例電路板、CD、醫學儀器等等，即係話過去幾十年，全世界都冇人做回收白銀生意，因為回收來重造比買新既仲要貴好多好多，白銀於是一路咁消耗，d人換電腦就去左堆填區，銀飾唔要就丟落垃圾桶，最後亦係去左堆填區。

-

後果係點？唔使我多講，大家都估到！當有一日，如果國際上買唔到足夠既白銀，咁所有礦商或者銀商第一步就係將銀價提升到足以支付回收循環再做的價格，以補充貨源不足。咁咩價先至做到回收？租金、人工、收銀店的傭金、燃料等等，相信冇每兩$1000以上都唔得。投資白銀一定要有耐性，好戲還在後頭。

寸到應一應

假金事件的離奇唔係得我睇到，只係冇真憑實據，傳媒都唔敢開聲反擊，不過寸番一兩句又無妨，今日信報的一段小評論就在最後一句講：

本周壓軸，就是本港爆發「假」金風暴，然而假金成本高，騙徒恐怕是真蠢。

假字特別用「」括住，雖然畫公仔未畫出腸，但細心人一睇就知，最離奇係今日兩個金銀商會拿拿林澄清話，會員所賣之黃金絕無問題(詳情請看lisa的blog)，然則即係假金只係佢地唔小心被人「厄」，同一般市民無關，總結就係買金要去佢地其下會員金行買喇，咁放金呢？又冇講喎，咁即係想點？

對黃金白銀收藏價值的意見

謝謝Nazis的意見，不過在下有多處不同意見解，現與大家分享！

「我媽30年前買了幾枚美國、英國及澳州的金幣，到了今時今日拿出來賣，原來只能當金價出售。後來發現，原來楓葉、鷹揚 .... 幣都是無限發行的，所以在收藏價值方面等於零。」

因為地球的黃金蘊藏量是有限的，所以沒有黃金製品可以「無限量」發行，根據美國鑄幣局的資料，鷹揚金幣每年只發行約6萬安士。

「中國的金銀幣是限量發行的，每套亦會列明發行量是多少，當然發行量越少，日後的價格大有可能會越高，如在09年的時候，買了一套金銀幣給太太做生日禮物，當時的價格大約是3600人民幣，現在出售的價格已經升到7200人仔。所以買金銀幣的同時，亦要先清楚了解當中的歷史及運作，這才可以收到投資的最佳效果。 買中國的金銀幣另外還有一個好處，除了享受到金銀價格的升幅，亦可以得到人民幣升值的間接利潤，這就是我投資在中國金銀幣的原因。」

金幣或銀幣的投資價值可以分割成兩個部份，一是金銀本身的價值，二是其發行量或藝術性的價值。一購買的是金銀本身真實的價值，二則是購買發行機關的承諾，如承諾限量發行多少個或請了某著名設計師設計等等。發行機關的承諾就像CDS、CDO、債券等，有違約風險，假使有一日發行機關違約，投資者亦無從追討。第一種價值，每日在國際上都有個公開的價格可以參考，而第二種價值要靠人為主觀判斷，其價值亦因購買者喜好不同的轉變，討價還價所浪費的時間與精神亦是成本的一種，對有工作在身或事忙之投資者，投資第一種價值的金銀比較化算。

「如果好像孫柏文所說，銀價在幾年內會到120美元，請問一個銀幣貴十元八美元塊的溢價，對日後的收益會有影嚮嗎?? 萬一銀價大升只是一個傳聞，十年後的價格跟現在一樣，你現在投資的在毫無收藏價值的白銀上就不能對抗通漲，更加要蝕買賣白銀上的差價。 」

擁有美術或紀念或限量價值的金銀幣，在經濟好的環境下有時升值很快，因為人們收入增多，有多餘錢去買自已心儀的藝術品。但經濟好並非必然，在1930年代的美國經濟大蕭條及70年代的石油危機下，藝術市場大幅萎縮，人們沒有多餘錢去追求不設實際的玩意，美術或限量性的錢幣可以大幅跌價，如上圖是1930年代由Nelson Atkins於拍賣會上投得的拜占庭金幣，金幣在繁榮的20年代比相同重量的黃金要貴很多，但當經濟陷入哀退，其所擁有的歷史及稀有價值隨即大幅下跌，結果給Nelson以低價投得，20年代買下此金幣投資人因此損失慘重。而同期相同重量的普通金幣因為貨幣出現危機，升值了167%。

通賬之下，歷史證明白銀及黃金大多數都是升值，因為擁有貨幣性，所以如果通賬再臨，很大機會不會只有限量發行的金銀幣升，而普通的金銀幣不升。通賬來臨，物價高企，收入會追不上通賬，如1920年德國，工人要一天出兩次薪金，人人為衣食擔憂，會無閒情去收藏藝術品，所以擁有紀念性的金銀幣很可能會跌價，跌回金銀作為貨幣的基本價值，而普通金銀幣因為購買時少了溢價，又可作為貨幣對抗紙幣貶值，升值會更多。

PS：普通金幣的優點：可作抵押品
金與銀的價值不獨可以作為美術性及紀念性收藏，自古以來最大功能是貨幣性，所以很多銀行會接受金銀作為抵押品借錢，如永亨銀行就有此服務，將黃金抵押可借到金價的70%價值，是樓宇以外最佳的抵押品。
http://www.whbhk.com/webpages/zh-hk/html/investment/gold/gold.html?id=card_services_types_gold

在黃金作為抵押品上，銀行並不會考慮金幣或金條的紀念性或限量性，而只計重量，所以如果買的是普通金幣，就比用溢價買回來的限量金幣更要著數。因為在判斷限量性及紀念性時，銀行要找專家判斷，當中涉及成本，而普通金幣只需參考國際金價就可簡單判斷其價值。

離奇假金事件之二

上回講到香港爆左單假金時件出來，點解會咁呢？原因有幾個，其中一個168的SP兄幾個月前解釋過，小弟深表讚同。

-

1/ 首先大家要了解到金行收入來源有d乜？其中最大部份就係黃金的買賣差價，Bosco兄之前統計過，無論金價高低，差價大約係佔金價的3-5%，由最低的$400-$500升到今日的$1000樓上，雖然按比例差價無大幅擴大，但金價上升，差價收入就會變多。

所以，金價低時，收金店好難支付店舖的租金，但當金價升時，差價變多，就會俾得起租金，呢個可能係收金店陸續出現的原因，咁樣就會搶走大金行的生意，連忠記呢幾年都做收金，大家就知幾和味，但忠記畢竟位置吊腳，收金店就唔同，開正大街大巷，連屋村商場都有，實在係對金行生意的一大威協。 放出假金新聞，就可以嚇一嚇d收金店。

-

2/ 大家有冇留意到，細金行好似愈開愈多，而且好鍾意大大隻字寫出來話高價收金，而我所知，灣仔鵝頸橋附近就有一間會出高一點的價，點解咁蝕抵都肯呢？原因可能係細金行根本買唔到足夠黃金賣，亦有可能係金價升左好多，就算賺少d都一樣有肉食，無論係邊一種原因，都係對本地金銀業訂價機制的挑戰，後果可大可小。

黃金唔使好似股票咁一定要透過交易所買賣，民間亦可私下買賣，如果你要同隔離屋二叔婆買條金連，連政府都控制唔到，放出假金流言，就係對民間私下買賣的打擊，繼續維持香港金價跟倫敦、紐約走的格局。

-

3/ 今次時件係由倫敦報業發出，而金銀貿易場就隨即和應，話過去一年已發現多宗假金個案，既然一年來不斷發現，點解唔話比本地傳媒知，而要等到英報紙報導先至講？好明顯本地傳媒唔夠國際性，對各國以至本地投資人士起唔到阻嚇作用。外國人點解好地地要來香港買金？香港是全世界對黃金買賣最寬鬆地方(美國收20%稅，印度就收50%)，好多香港人唔識寶，但外國人就好清楚。從各位對呢件事反應，我相信報導係想減低大眾投資黃金意慾，因為仍然有好多人會買金飾當投資，其中一個係立法會議員梁美芬(http://orientaldaily.on.cc/cnt/news/20091028/00176_091.html)

-

4/ 大家不妨去金貿場個網睇睇，原來半年後推出黃金檢驗服務，每兩收$50，相信呢單新聞可以為將來增加唔少收入。我相信好戲陸有來，且會愈演愈烈。

-

綜合幾間報章的訪問，大部份金行都冇講如果市民買到假金可以點？點解佢地唔講？因為心知肚明教左人會好大鑊！睇睇周XX係大陸單成色唔夠的新聞就知，所有買過相關產品的人都可以要求回水，如果出現的唔係K金，而係9999金，到時真係有唔妥，真係死都唔得店，因為買金的人都係用以收藏，佢地賣左咁多年，後果你話幾大鑊？

其實香港黃金法例的保障已非常足夠，就係金器一定要付合商品說明條例，成色可多可少，但唔可以厄人，照咁講，有人拿一件不知成色又無收據的金器到金行賣，金行當9999收，跟住話人地賣假金，根本就係亂來。人地根本就冇犯法，係佢地自已笨賊唔驗清楚！

離奇假金事件之一

昨日下午突然收到電訊商發出的SMS，話香港出現假金，今日再睇新聞，各方都言之鑿鑿，更有假金的相片刊出，連電視台有都講，相信一定令到各位好擔心！

今次已經係年內第二次有相關報導，我覺得大家唔使擔心，因為成件事只可以用兩個字去形容，就係離奇，而且係「好離奇」！

離奇一：冇人報警！
根據各大報章講，受騙金行及金號只向同業的商會組織等匯報，並冇報警，《星島日報》更轉述海關發言人話，由2009年至今並未接過一間金舖或擋舖的舉報。既然假金問題如此嚴重，坊間收金店又如此盛行，竟然冇一間受騙的商號請警方或海關幫手調查，大家話奇唔奇？請警方調查又唔使錢，唔通商會及組織會幫手捉賊？自行發出指引叫會員小心檢查會好得過警方幫手查嗎？

唔報警，商會有解釋，今日《平果》報導：九龍珠石玉器金銀首飾業商會理事梁永強話，因為對方所賣之黃金只係成色不足，所以警方話對方冇賣假金，而係金行高估黃金成份，對方唔算犯法，所以會員金行冇再搵警方幫手。

其實根據香港黃金法令，只要金器與金器上或收據上寫明成色不附即屬違法，梁某唔係咁都唔知呀？定係來賣金器之人根本唔知成色？更冇收據，但金行都照收？如果係咁，就唔係人地有心欺騙，係金行自已唔小心。

因為世界各地的金器都有唔同成色，例如印度，好多金器的成色都唔夠，只有7至8成。人地由外地來香港賣，鬼知你一定要純金咩？拿來香港金行賣，你自已唔check清楚，就賴人地賣假金，成件事你話幾離奇？其實只要細心check清楚成色，咪照成色比例俾錢羅，五成就俾五成錢，七成就俾七成錢咪得羅，一分金就一分錢，呢方面金行可以購買驗金儀器幫手，錯不在賣金人。

離奇二：行騙成本高昂
根據各大報章講，假金中的真金成份由5成至9成不等，其餘則為其他金屬，如銥、鋅、鐵等，且是用極高科技製成，真假難分。換言之，要製造一件假金器成本最少是現金價的50%以上，騙人1000萬，單是買金成本就要500萬，再計埋其他金屬的成本，還有高科技製金的設備，再找人到金行行騙等等的成本，最後的利潤有多少？大家可以細心衡量下值唔值？我覺得用500萬買金等升值，其實化算好多！如果真金成份高達9成，大家話有冇可能？(資料來自168的SP兄)

究竟今次事件為乜？且看下回分解！

到大陸買銀過境要小心

首先多謝nazis的分享，在下的紀念性白銀真的很精彩，不過，我地買銀最看重是其貨幣性，即是白銀的單純價值，所以買白銀，只會買愈接近市值的白銀，如沒有任何多餘手工費的銀條，年份愈近的銀幣等，因為對於銀甲蟲而言，紀念性只是多餘的溢價，相同重量的白銀熔了後，一樣只是白銀。相同重相的白銀原材料亦可以製成有紀念性的銀器。

雖然部份發行量有限之白銀製品更具炒賣價值，可能升得非常快，但沽出後變成紙幣，同樣要面對貨幣貶值的風險。

另外，上大陸買銀買金，要非常小心，數量少還可以，若像這裡部份銀甲蟲那樣一買就買幾百兩，過關會非常危險，因為根據中華人民共和國出口法律，所有出境人士不可帶超過一兩的黃金及十兩白銀，捉不到由自可，被搜查到，不但會充公，還可能被扣押。今年6月中，有一港人帶13斤黃金出口，就在羅湖被搜查到，現被扣押，等候判刑！

另一方面，大陸曾有報導出現假熊貓銀幣，亦是一大問題，因為這裡的人可能一買買一百個，不可能續個檢查，所以一定要去非常有信譽的地方買。

PS：黃金及白銀是國家重要資產

根據內地刑法第151條規定，走私國家禁止進出口的黃金、白銀處以刑罰為五年以上有期徒刑，情節嚴重者可被判無期徒刑或死刑，並且沒收財產。

跟進黃金變色問題

今日咁岩去中環做野，為左悉除大家疑慮，於是將168師兄的有問題金條相片PRINT出來，拿去忠記問一問，睇下有冇問題？

忠記老闆話好平常，如果你拎呢條金條去，佢地會照收！咁究竟金條有咩問題？根據忠記老闆話，係氧化，原因同我親戚講的一樣，製造時可能清整得唔夠好，殘留左些少其他礦物係金條表面，另外99金條雖然係純金，但仲有1%係其他物質，1%亦可能導至局部氧化變黑，老闆拍心口話絕無問題，金塊時常出現類似情況，好少事。

咁有冇解決方法？有！就係用火槍對住發黑部位噴，真金不怕紅爐火，黃金溶點有1000度以上，其他物質被火熔了之後，金仍然會完好無缺，黑色就減退或消失。我再問老闆，如果拎來忠記搵佢地幫手搞，收幾錢？老闆拍心口：免費，而且會係你面前搞店！