2010年5月24日 星期一

感慨萬分

近排股市同匯市的波動,令好多人損手,U記果邊亦風聲鶴淚,連果幾隻要跑分先至可以入到總壇的股,好似82,都可以一日跌12%,呢個時候亦例牌有淡友出黎寸一番。今日睇八掛雜誌,一眾名人亦慘蝕,名模姚書X買歐元蝕30萬,更有白痴婆莊x敏買倫敦金慘遭受騙,雜誌話佢係拿督之後人,睇黎拿督並冇將醒目基因傳俾佢。

我幾個親戚亦全部坐艇,佢地因為得到一d非常內部的消息,個個訓身入市,最勁果個一買200萬,開頭果隻野亦真係好勁,短短幾星期就升左30%以上(致於係邊隻,真係唔好意思,唔講得,因為係好內部既消息),不過始終敵唔過大市走勢,近兩星期亦大跌,甚至跌穿佢地買入價好多,佢地唔捨得走,而家前路茫茫,我估計之前贏左既,大部份一舖清晒。

因為係內部消息,我同老婆亦有買,好在佢有BB,見跌勢不止,心情緊張,因為驚影響情緒,已平手離場,其後跌勢更勁,算執番身彩。對呢d細股,就算係幾內部消息,我都唔會放上心,只會買少少,亦一早有心理準備會蝕晒,所以從來唔後悔!

不過,我最失敗係冇辨法令到我身邊幾個比較親既親人買金,其實係我上網叫人買金前,已經叫佢地買,但只有一兩個跟,且只係買得好少!到而家佢地有d仍然放唔低對黃金偏見,有d就認為升得太慢。

結果佢地仍然係以玩股為主,好喇,差唔多四五年過左去,大部份都係蝕既多。其實我有時諗唔明,點解佢地會咁傻,如果我做一樣野,做左幾個月都冇成績,我就可以賴運氣唔好,但如果做左幾年,仍然係咁,就應該好好檢討下,方法係唔係出左問題?定係大方向錯左?

我知冇辨法令佢地買金,所以出於好心,亦有叫佢地如果玩股時,不妨認真研究下,最低限度都學下果d成日講價值投資法的分析員,或者買一d藍籌平衡下風險,好過終日炒細價股,日日好似買大細咁,但講極都係唔明,話果d藍籌郁得慢。好似佢地咁玩落去,可能過多四五年,過多十年,結果亦會係一樣,因為從過去四五年的經驗已經證明佢地既方法唔work。

6 則留言:

jasonchong 提到...

忠言,始終得難聽得進去 ,,, 一個人類已習慣了近百年的金融觀念,要轉變是極困難!幸好我勸得服我的媽媽,買了兩隻銀幣 ,,,,

gogoldjoe 提到...

thanks

Lisa 提到...

其實乜內部消息只是老千陷阱, 莊家佈的局 !
先自己在低位收集, 收夠貨後叫親朋戚友買貨至到外面散戶跟買就散貨 ! 呢 D 股叫妖股, 所以好多人會走唔到變接火棒 ! 所以我絕唔會買消息股 !
如果股票唔升幾倍又點可以吸引 D 人訓身呢, 所以做人唔好太貪 !

gogoldjoe 提到...

非常多謝lisa姐的提示,講到股,我相信你一定比我有更豐富經驗,其實我自已都懷疑過,因為當我地買左冇幾耐之後,我發現親戚的朋友都知道了,且係經紀告之,而我親戚從來冇跟那朋友說過,那時我已心感不妙。

patrickking30 提到...

所以我成日都唔恨有"內幕消息"

要賺錢只有在別人都不"留意的地方下手"才有機會

阿man 提到...

親戚現在知道內幕消息就是買金,200萬買幾斤金大部份時間都不用坐艇