僅佔環球資產千分之一 黃金長線值博

作者: 黃國英 (內容由Quamnet提供)



叫人買金，難過登天，正因如此，先至抵博。



推介黃金，有禮貌的散戶，或附和曰：「好呀」，但聽後水過鴨背，行動缺缺。更多是：「哇，升咗咁多，好貴呀！以前幾百蚊美金一盎，我都唔買，唔通成千五蚊一盎，先去買咩？不過黃生，好唔好買招商銀行(3968)呢？有無得升呀？」「招行幾蚊雞上市，宜家廿幾蚊，夠升咗幾倍，咁你又恨買呢呵？」此乃散戶不自覺的心理盲點，亦乃黃金值博率的來源。



以古鑑今，回看樓市：2003-2007年，緩緩上升，但投資者稀。2009年海嘯後，樓價墮後急漲，炒樓之風，才趨熾熱，但普羅大眾，仍是心大心細，猶猶疑疑，拒絕上車。及到2010年底，漲幅加劇，直逼九七，方恍然大悟。投資情緒鐘擺，由嫌三嫌四、恐懼保守，忽然擺到見樓即買、貪婪不已的另一端。前幾年看錯市，滿街平樓不買，當然不會反思。買本《地產霸權》，自傷自憐，怨天尤人，邊罵邊買，不在話下。事後孔明，當然是「早知沙士買啦！」，但如果投資心法，不斷是唔hit唔買、唔貴無買，只會落得「一世悠悠長，『早知』千百次」的下場。深信幾年後的暢銷書榜，應被《黃金霸權》雄霸。


機構投資者大大聲細細注



事實上，機構投資者，雖然看好黃金者眾，亦只是大大聲、細細注。據估計，全球黃金市場的總值，約在1.1萬億美元水平，與此相比，環球股市、債市總值相加，共132萬億美元，金市可謂魚毛蝦仔。而且在該1.1萬億中，可供投資者投資的，如ETFs和金條，僅佔19%。簡單計算，可供投資的黃金，竟只佔環球資產的0.14%！這個比率，等同閣下有一百萬身家，只有1400元的黃金。由此可見，黃金絕對是over-talked, but under-owned的資產類別。



或曰：抗通脹，可以用「與通脹掛鈎債券」出擊(簡稱TIPS)，「正！有息收又唔怕通脹，去邊度搵呀？」看似有理，但細心一想，且慢！TIPS實收債息，會與消費者物價指數(CPI,官方的通脹數字)同漲。買TIPS抗通脹，罩門有二：首先，TIPS所用的CPI，是美國而非中、港的通脹數據。美國衰敗如03年的香港，物價升幅，自是較低。用美國TIPS對沖香港生活所需，難言有效，例如交易所掛牌基金TIP，歷史年息率，只是2.8%，跑輸中港CPI一截。此外，通脹難壓，CPI卻可輕易操控：政府可以藉故改變CPI的結構，壓低CPI的數字，從而少付利息。



狂印銀紙激發通脹



「一定有通脹嘅咩？」死心眼如此，可參考佛利民(Milton Friedman)名言：Inflation is a always and everywhere a momentary phenomenon.化成常人能明的語句：通脹是印銀紙印出來的。誰有印鈔機？政府。為什麼政府要狂印銀紙？因為莫水，入不敷支。何故入不敷支？因為福利永不嫌少，派完錢，都怨氣沖天；唔派，搵亞水選你？加上債重息高，越借越大，還到氣咳。當然，中國亦是此道高手，GDP升9%，M2升16%，只是大家唔覺而已。