2010年11月30日 星期二

關於黃金出現問題



最近有師兄的金條出現黑點及紅點問題,今日打電話俾做過打金師傅的親戚查問。親戚話,黃金是礦物,一定會有雜質,在煉金的過程中,有兩個步驟去清除雜質,第一是熔了原材料金塊後,將浮面的雜質整走,第二是冷凍後再浸強水。

如果呢兩個步驟做得唔好,就有機會出現發黑及紅點的情況,但呢兩種情況都唔係生秀,因為生秀的過程會令到重量減少(呢點我未讀過化學,不能證實佢講得對唔對),所以做假金通常用包金,以黃金保護內裡的其他物質,很少會於表面出問題。只要將金條於在電子磅磅一磅,重量不變的,問題應不大。

親戚又話,香港所有金器都要刻上製造商logo,若真係有問題,可以直接去搵製造商,有單有據,對方會驚過你,因為是要上身的(犯法)。以佢做了多年的經驗,佢覺得咁大間公司應該唔會賣假金咁大膽,因為小金行,以佢見過咁多年,都冇人敢做。

親戚最後講,如果真係唔知金條有冇出問題,可以去熔金公司或金行(最好有老師傅果隻),如忠記問一問,對方一定會好老實咁話你知。

親戚又建議,如果抺唔走,可以嘗試浸強水,真金是不會怕強水的。不過,各位自已衝量下當中的風險。(相片來自168師兄,謝!)

4 則留言:

馬蘭奴 提到...

今日特登走去忠記。我同個掌櫃講,我有 D 金銀貿易場既五兩金條,不過有 D 黑點同啡色好似鏽既野,問佢收吾收。佢話見到金銀貿易場既金條就收。最後我直接問佢:乜你吾怕係假野咩?佢既答得好奇怪,佢話錢係我畀你,你理得我!

金錢一一 提到...

答得絕,絕咗你再問第三條問題。

Lisa 提到...

人地收慣金銀, 一睇就知真假, 而我地普通人便係唔會明的啦 :)

Joe 提到...

所以我對香港所賣之黃金好有信心,間間製造公司都係幾十年老字號,好似利昌咁,櫃檯清一色係年過半百的阿叔,冇人會想臨老唔過得世,邊敢做犯法既野。老字號唔注重外表,只講實際,後生一輩唔識欣賞,我就覺得佢地老實過光鮮既銀行。