2010年11月3日 星期三

關於白銀的回收問題

最近有幾位網友留言,擔心白銀的回收問題,例如利昌的白銀如果利昌唔肯收,咁點算?今日就講一講呢個問題!

其實係諗呢個問題前,要先搞清楚為乜要買銀?對我來說,買銀除左覺得白銀有升值潛力外,最重要係基於另一個同類的「擔心」:如果將來紙幣失效,冇人肯收,咁點算?

紙幣都會冇人收!?聽落好離奇,亦好似冇乜機會會發生!但以前真係發生過,日本留落來的軍票,民國時代的金元券,銀元券等。當時甚至因為通賬太勁,引至紙價大升,40年代,廣州就曾經因為紙價太貴,而回收紙幣,循環再用來做紙幣(將面值大大增加),即是說,當時紙幣的價值反回其基本價值──紙張的價值,甚至比普通紙張要便宜,因為上面已有油墨,回收的紙幣要先清除油墨才能再印,價值當然及不上白紙了。

用同樣的方式去思考,如果今日我地因為怕紙幣失效,或者大貶值,咁應該點做?買金買銀,成了冇辨法之中的唯一的辨法!因為歷史話俾我地知,金銀從未失去過價值,就算佢地既貨幣性消失,都仍然可以有好多用途,特別是銀,醫學上用途好廣泛!我地很難以其他資產去取代,如生活必須品的豬肉、牙膏?呢d野都有儲存期限,會變質,冇可能長期持有。

既然買金買銀是為了消除「貨幣失效」的擔心,買了金銀又反過來擔心金銀會有失效的一日(如發行機構不肯回收),那豈不是又要為金銀買保險,做對沖?那又可以用甚麼做對沖?難道買回紙幣?買回了紙幣豈不是又再面對紙幣失效的擔心?

所以結論是:如果你從沒有想過紙幣會失效的問題,那就同樣用那種心情去面對手上的金與銀,即是不去擔心其失效問題,若你有想過紙幣失效問題,那就將部份紙幣改成金銀,你無需再為金銀失效而擔心,因為你持有紙幣已經為金銀做了對沖,除非你已經是將手上紙幣全部「清倉」。

42 則留言:

Lisa 提到...

我剛才都說, 如果有日超市只收金幣和銀幣, 到時就有等值交換的價值 ! 在網上見到在美國有個小鎮的商店是收金幣和銀幣的 ! 不過無 save 抵, 無咗條 link !

Lisa 提到...

所以暫時買銀都是長揸, 所以唔好用曬成份身家, 因為如果你急須錢用, 就要殘價沽了 !

Eric 提到...

Kitco 銀楓葉賣出價格1盎司 220.62 港元/枚...中銀 1盎司銀楓葉 1 安士220.00 ....以前中銀平過Kitco好多...現在一樣???????????

jasonchong 提到...

今日我屋企樓下又開左間K金回收!每當我見到呢類鋪開得成行成市,而每日都見到唔少人將手上的金器交出變賣時,我就感覺到,黃金大顯神通既機會越來越大!亦感覺到另一次財富轉移又快將出現 .... 知識改變命運 .... 中國人傳統流傳的藏金智慧,又有幾多人明白?

馬蘭奴 提到...

我早兩人上過 Kitco,直接問過果度D人,有個少姐話 HK Kitco E + 仲未有一套既定o既回收政策。佢話金、銀幣就一定回收,但係金、銀磚就吾一定。可能要轉開個磚身驗過先收。就算係佢地自己出既都係咁話。我問佢驗磚費由邊個出佢又講吾出。其實又好難怪佢地,最近有D金行收到吾少假金,吾見左好多錢。大陸出既假金又愈來愈手工精良。最後佢話我可以將D金、銀磚寄過加拿大既 Kitco 賣。

小C9 提到...

馬蘭奴,
我有d唔明,佢地個網寫明會回收

(eg. Kitco100盎司澆鑄銀條提煉自99.9+%純銀,印有Kitco標誌。該銀條同樣標出了具體的重量及純度。
Kitco保證可以回購所有印有Kitco標誌的白銀產品,在重新銷售的時候,價格為現貨市場的買入價或更高。
在加拿大境內交易,在交貨時稅款適用於Kitco標誌的銀塊產品。)

如果宜家又話唔收.咁算唔算呃人? 佢地唔怕d人去消委會投訴咩???

馬蘭奴 提到...

我都睇到個網寫既野,所以咪上去買野 lor,點知口多問句,果位肥肥地既少姐就好老實同我講其實到 E + 佢地都未回收金 / 銀磚,又話要驗過先可能收。我今朝打多次電話去都係咁講。
老實講,經歷過金融海嘯,大家都知到 D 金融機構有幾老實。Kitco 雖然賣實貨,但吾一定等於佢地都係老老實實。我響佢地本小冊子(其實都幾大本)見到話有金屬委托儲存服務,咪又多口問句。果位少姐話你響佢地度買完貴金屬之後可以寄存響佢地果度,納少少倉租就可以。然後我問佢如果我想(才羅)黎睇睇可以點做,佢即刻話,冇得(才羅)黎睇。我問有冇響舊磚上面寫明係我所擁有,佢話冇。如果係咁我真係吾知同 D 紙金、紙銀有咩分別!會瘋 同 痕身 既紙金既然都信吾過,小小既 Kitco 會更信得過咩?經濟學既立論點係凡人都係自私,今次金融海嘯大家都睇得好清楚。大金融機構係由人所組成,Kitco 都係由人所組成,本質上我吾相信兩者會有太大分別。致於佢網上所寫既野我睇過笑一笑就算。
致於怕吾怕畀人地告,我記得我早兩日行過痕身,門口有班迷債苦主大叫老千銀行。銀行一開始夠話100%保本,最後點大家都知。印象中佢地都好似叫左年幾兩年,人地連警察、銀監...都去埋。小小一個消委會吹得佢脹咩?痕身門口除左企多左個食蕉之外,就乜防範都冇,你話 E + 既世界,呃完小市民駛吾駛驚呢?

Eric 提到...

買金、銀幣la!!!!!!!!!!!!!!!吾好買銀條銀塊........

小C9 提到...

Eric,
你意思係喺kitco買coins only? 如果我冇記錯, 你好似有好多銀條ga bor?!

Eric 提到...

hahaaaa....係..我現在有1200兩銀條....但是我d銀條係中國銀行買...銀行一定回收...但利昌..kitco,唔同銀行..

小C9 提到...

哦. 但宜家銀行都冇貨賣la bor. 咁可以點?

不過跟據Joe既theory, 去到要賣銀既時候, 應該好多shops(好似宜家回收k金店咁)會收. 啱唔啱?

Eric 提到...

係....係有位師兄驚利昌老闆退休唔做,中銀又唔收利昌d銀條....Johnny兄問如利昌將來唔買唔收銀,咁買了的銀絛可以去什麼地方放?因為沒有太多資金,所以想知道清楚些..去到要賣銀既時候應該好多shops會收..所以唔驚

Eric 提到...

如果驚may 買楓葉銀幣low..多d地方收..認受性高d...

小C9 提到...

Eric,
我唔係驚放唔到貨, 只不過想知除咗中銀, 邊到買銀條好or你唔suggest(宜家)買銀條, 買coins好d?

Eric 提到...

宜家得中銀,利昌,Kitco,有銀買..中銀冇貨..除咗中銀,去kitco買楓葉銀幣好d..

小C9 提到...

Eric,
謝謝你的意見!

匿名 提到...

我剛剛也買了一些KITCO LOGO 的 1OZ SILVER BAR, 也有它們回收上的疑問, 所以剛剛直接寫了個EMAIL向KITCO的主網站問香港KITCO的回收是什麼一回事?
如有回信會告訴大家

馬蘭奴 提到...

其實如果買銀條係用黎長渣,我又覺得吾駛太擔心。照 E + 個勢睇,未來三五年白銀會變得非常搶手,到時可能又會響 D 大商場出現一 D 收銀既舖頭。其實我早兩星期去過利昌,又係多口問句話如果我有 D Kitco 既銀條問佢地會吾會收,呀叔答我睇o下個價啦。咁即係有得傾啦,不過吾知食水有幾深。
其實我反而擔心既係大陸果班人,近幾個月都聽吾小假金假銀既新聞。我識一個響大陸周猩猩做既朋友,我問佢大陸 D 造假工業咁先進,怕吾怕會收到假金 / 銀條。佢話好簡單,收到既金/銀條成條當面熔左佢先買,包冇假野,不過吾知要加幾多手續費。

Gordon 提到...

Kitco已回覆我有關他們的回購KITCO產品的政策將於12月進一步公告, 我複製了原文如下, 以供大家參考.
"Regarding your concern about selling to Kitco Hong Kong service, the service is still in the discussion stage, and will most likely be launched in December 2010. Kitco products will definitely be our buy-back items. It's just a matter of time, we may or may not buy back at the first stage. More details will be announced in December".

小C9 提到...

Gordon,
Thx. for your info. I also think that it just a matter of time for them to buy back their products. :-)

Gordon 提到...

剛剛睇左LISA個BLOG才知道中銀收楓葉銀幣只會收以前有膠套包住那些才會用楓葉銀幣價錢收.而家新的楓葉銀幣,無膠套那些只會當跟普通銀價回收!我睇完好驚訝,覺得佢在自己網站公告了回收價, 但原來仲有隱藏條件先收那個價的,感到連香港-國際公認的金融中心, 竟然連一個標準的白銀回收市場都無,感到好無奈.

Gordon 提到...

估唔到最後不如又回到用老方法,信老字號!如果純粹投資實銀, 我不如去利昌買銀,人地老字號講明會跟公價回收番,扣幾多火耗又明碼實價.

Lisa 提到...

供求問題 !
多人出貨, 回收機構會壓價; 多人買貨, 價格搶上, 到時會多機構出來回收 !
所以買實銀投資要用多餘錢, 而須放十年八年 !
年輕人不要以為可以炒短線好似炒閃卡咁, 呢度買個度賣 !

匿名 提到...

我今年3-4月時問過Kitco幾時有回收,佢地個肥仔員工話俾我知大約6月份會推出, 咁我咪同佢地開戶買咗啲銀幣. 點知佢地由6月推到8月,我再打電話問佢地啦, 個肥仔又話係秋季推出,到 E + 都未實行到, 12月話會推出,到時又實會再推遲架,淨係識耍人同呃人去買貨,又唔回收......劣劣劣....

Lisa 提到...

買實銀一定要預 keep 佢十年八年 !

匿名 提到...

因為自己資金有限,我個人對買金銀的態度就像是急救箱裏的藥物,需要時便是萬應靈丹,可用來救命!

schroeder 提到...

今日我去過 Kitco 買
係有個肥肥地職員話 佢地現在都一定會收番所有佢地sell的銀
網上亦有回收價。

但我頭先再上網睇, 100ounce silver bar 又冇左過回收價
Oooooo

金多祿 提到...

好消息! 金拓很高興宣佈本公司今日正式推出貴金屬實物回收服務。此服務只為曾與Kitco有過交易的現有客戶獨享,現階段的回收類別適用於Kitco HK所提供之貴金屬鑄幣,而其他貴金屬條塊將會預計於明年上半年度內回收。

匿名 提到...

早幾日去利昌買500g銀條 拒地o既差價係$250/1條左右

匿名 提到...

新手想試下買白銀保值但擔心以下問題:P
請問一下白銀的保養方法~~放係電子防潮箱會唔會好D??
如果氧化左會唔會有地方回收??
麻煩晒~~~><

Joe 提到...

防潮箱會好d,發黑都會照收!(中銀及利昌都會)

匿名 提到...

kitco買既楓葉銀幣利昌都會收架可^^??

小C9 提到...

Kitco 一有coins 回收服務就將coins回收價降低(即係spread 大咗),especially maple silver coins(多人買,所以回收價降得最多)。新返果3款silver coins 好人買就即刻加價。所以銀磚買賣價都唔可以作準,就算預佢地將來有銀磚回收服務,佢地都可以随時變(搵笨!)

匿名 提到...

我係新人,都唔係太明白,究竟應該買銀幣定係銀磚? 如果想買幾萬元,每個銀幣都貴d,升值係因為銀本身的價值,那不是銀磚都可以?

阿葉 提到...

想請教各位大大
利昌回收自己鋪的銀條差價太約是多少?

hugo 提到...

1兩減14蚊

匿名 提到...

請問Kitco收唔收架Kitco1盎司銀塊 ?

匿名 提到...

所以買金銀要買標準的,人地收就容易,好似長城銀條,你羅去中銀,唔洗稱,唔洗驗,你比條佢,佢比現水你
ALEX

匿名 提到...

買賣金銀,最緊要的是要看**價差**,即買賣的交易成本,金幣價錢係比金條高,但你放番出去亦會高,所以,最重要是看**價差**,,如果你買金既目的係投資,金銀業貿易場既99金條係最好選擇
alex

匿名 提到...

聽人講好多人去澳洲玩的時候, 都會買番d銀幣回港, 是否真呢, 在澳洲那地方可以買呢? 謝

匿名 提到...

http://www.perthmint.com.au/

匿名 提到...

各位,大家好!

本月從網上見到「金城金條有限公司」登廣告,看過後生岀興趣,因可以透過網上平台少量購買、掛單,所以揀選了這家公司開戶籍

對於金銀儲蓄,本人是名剛接觸的初學者,經到這裡看過文章後,仍有些問題想向大家請教

1)文章裡見甚少提到「金城金條」這公司,公司有售賣多項品牌的金銀,更有岀售「利昌」500 克裝銀條,而「金城號」這家公司的老闆,是"金銀業貿易場"委員之一,請問在"金城"賣金銀是可靠嗎?

2)「利昌」500 克 999 裝銀條買 $4580.52,而「戈壁」500 克 999.9 裝銀條買 $4335.28,為何純不及後者,卻會買得更貴呢?

3)各品牌實銀存有"重量相同但純度不相同,而售價卻不均等"的情況,我應如何選擇購入那家公司岀品的實銀呢?

謝謝大家

Daisy