2013年5月26日 星期日

賣金者小心!

收到網友Grace來信,講述她朋友的賣金的不愉快經歷,各位網友,如有不時之需,要出售金幣,應當小心!經歷如下:(相關銀行將以代號表示)

====================================================


本星期一中午我朋友拿了兩塊1安士的楓葉金幣去銀行賣,那兩塊是有原廠套的嶄新的金幣。以往她都是在BOC做的交易,而每次交易前都會先查一下價格,心中有數再去,BOC效率很高,金幣管事的看看OK就報價,有時講多兩句價格變了還報多一次價對方確定後再下單。那天她因有其它事要辦,也沒有先查價,就去了比BOC近的HS,心想BOC每次交易都正常、老實,HS更加無問題啦!哪知就這個信字害了她。

去到HS排了好久的隊終於輪到,那管事的老男跟櫃台女的嘀咕了好一陣,那女的報了個價,朋友一聽心想唔通今天開市跌了好多?一抬頭那女的已經下了單在忙了,她也就無出聲,反正也是要賣的。她提了一萬出來,剩下的擺儲蓄,就那萬零蚊那女的還游說她拿去買蓄儲保險,說現在銀行利息太低,不合算,買蓄儲保險才保值,朋友無理會就走了。那天上晚上回去一查,當天十二點幾國際黃金報價大概一千四百二十幾至三十幾USD,她賣的價是
11090HKD!頓時明白她的楓葉金幣被當普通金而不是金幣收了。但一般要當普通金價收,那起碼也要同個客講清楚有瑕疵當普通金價收吧?甚麼都無講當你是白癡!

第二日一早她就去HS理論了,剛好找到前天的櫃台女,那女的找了一中女講了,中女就兇巴巴地同我朋友講:錢已入了你的帳了,你還來做干甚麼?!。朋友說價錢有錯,要改。中女說這是昨天的帳,我們無得改。

朋友問有錯都不改?這時年輕男走過來,拿了一份各金幣含金量(包括楓葉)的東西說,金幣只只不同價錢,因含金量不同,你看,你個金幣含金量才91.6,其它有99.99,你那個當然賣的便啦。他居然指著鴻運的含金量套在楓葉金幣上,即便如此,鴻運也沒有因此賣得便宜啊!我朋友快暈過去了......又一老男(不同前日)過來說,有的金幣有加工費,朋友說只只都有啦。老男說楓葉金幣我們是不計加工費的,『即是你們將我的金幣當普通金收了,剛才又不認?』朋友說。老男又說他們規定楓葉金幣不計加工費。全世界都計,就它HS可以不計?!看著這班無賴加白癡,朋友知道再理論下去會中風的,健康要緊,只好走了。


21 則留言:

金錢一一 提到...

睇字都會聯想到係邊間銀行,有無單據做証呢?

Jo 提到...

已貼出她給我的收據!

金錢一一 提到...

有無試過書面投訴?照計咁大間銀行無咩理由為咗少少錢毀去自己招牌㗎。

Jo 提到...

我已建議她出信金管局備案!

但各位一定要小心,買賣一定對清楚價錢!

Jammy 提到...

點解相關銀行要用代號表示?
應該出晒名,最好寫埋branch,同埋嗰啲服務員係咩名(佢哋應該有name tag架)。

呢啲友不知所謂。第二次去Grace好應該扎哂佢哋啲名。

洗咩驚開名,而家啲傳媒最鐘意Bad Mouth黃金。你有咁大灘新聞證明連大銀行都出古惑,啲傳媒上網見到仲唔幫手轉載咩:)

Lisa 提到...

恒生都無回購楓葉金幣網上報價, 所以建議大家只去有報價銀行放啦 !

Jo 提到...

富格林也要留意!同樣沒有報價,大批放一定要續間格價!

s.beauty 提到...

只因恆生沒有楓葉的牌價,好難拗

arfoo@sky 提到...

ANA 當 GMA,
又有點兒那個.
而且 GMA 雖然成色91.6,
但都係足1OZ金喎~~~

Lisa 提到...

加拿大楓葉金幣和澳洲鴻運金幣都是9999, 不過中銀就有分有套和無套的價錢, 無套是平過有套成幾百蚊 !
美國鷹楊金幣才是916

Thomas 提到...
作者已經移除這則留言。
Thomas 提到...

hi, 我係剛加入金甲行列既新手。

想分享下我今日係HS買賣黃金既經歷。

話說我今日去BOC買左粒一安楓葉金幣@$11198

之後去HS九龍總行賣之前買落既細金幣,順便問下佢地唔同金幣既賣出&買入價。

楓葉/富格林
買入:$10760,賣出:$10810

鴻運/鷹揚
買入:$11280,賣出:$11330(同網上報價一致)

結論
始乎Grace冇被騙,係HS本來就係平賣楓葉(銀行賣出),平買楓葉(銀行買入),不過就唔係好明HS職員向Grace的解釋,乜唔係富格林同鷹揚先係91.67,楓葉同鴻運同樣係99.99咩?

而且原來去HS買楓葉仲平過BOC!!不過佢o地本身唔會入貨,只係賣客人賣畀佢既貨,所以基本上好難o係HS買倒楓葉(我自己連續幾星期打去問都冇,不過我唔係日日打,可能咁o岩o個幾日冇掛)!

Thomas 提到...

補祝:當時金價約USD$1387左右

阿man 提到...

令我想起這些對白:

唐伯虎:唔好去搶!
如花(立即變臉):冇錯,就係搶!

davidsoncheung 提到...

是否因BOC 有套既楓葉金才有較高回收價, HS 有冇套也是均一價?

Lisa 提到...

恒生最唔好就係無全面的報價 !

金錢一一 提到...

啱啱去痕身買咗個富格林,淨過鬼,櫃員依舊有禮。

Thomas 提到...

你好,金錢一一
請問你扎邊間分行買架?

金錢一一 提到...

中環總行

金錢一一 提到...

以今日買盤US$1393即約HK$10814
BOC收番都係HK$10809
如以單果日US$1430即約HK$11102
佢用$11090收番都應該算合理喎
而且單上寫GMA的確係1oz楓葉金幣咁解喎
單背面有寫

金錢一一 提到...

有原廠套嘅楓葉金幣好似得BOC至有得收高D,其他地方唔知