2011年4月1日 星期五

天下PAPER一樣黑,隊長唔使咁激心!




Paper有幾咁唔可靠?最近高盛日經窩輪開錯價事件就係一個好例子。發行商開錯輪價,當然要由佢地自已承擔損失,冇理由輸打贏要,投資者俾晒錢,先至單方面將隻輪停牌。

好似買樓咁,客人俾晒錢,簽晒合約,地產商見樓價急升就單方面取消合約,話自已開錯價。如果有地產商咁做,監管機構一定唔會袖手旁觀,打官司,客人贏面亦好大! 不過,窩輪又唔同講法,好似今次咁,監管機構竟然由得高盛咁做,小投資者點嘈都冇用!所以前幾日,白銀戰隊隊長孫柏文就在電視上發火鬧監管機構同高盛,激氣到爭d爆粗。

點解高盛同監管機構會咁大膽?好簡單,因為窩輪買賣合約條文一早有晒後著,合約寫明,發行商有權咁做,唔使投資者同意。當然,小投資者有權同佢打官司,睇下法官點樣判,但有晒合約條文,對方仲要係大機構,一定有排搞,我覺得不如慳番d錢好過! Paper就係咁,冇內在價值不特止,仲可以係上面寫乜都得,唔熟悉法律既小投資者當然好蝕抵,就算係稍為有經驗既投資者一樣會中招。

大莊家、大戶、大銀行、投資機構一早布下天羅地網,計算得好準確,小投資者想贏,好難囉!就算個天唔幫佢地,例如天災大跌市,佢地都仲有後著,大不了來個停市,或者好似半年前美國,一晚跌九百幾點,就話發生電腦故障,小投資者吹佢地唔脹!

實金實銀就唔同,冇評級,冇合約,成色唔夠,一驗就知,唔使爭駁。就算當年老美單方面玩停市,其他地方一樣照買賣,所以大莊家、大機構.....永遠唔會sell你投資實金實銀,因為交易雙方地位對等,冇灰色地帶俾佢地走位,小投資者權益亦有較大保障,呢d都係佢地唔願意見到既!

10 則留言:

匿名 提到...

講得冇錯...呢樣別就係我最唔想見到嘅嘢!!!一睇見就眼火爆, 算! 我係斯文人, 我唔同佢地玩呢啲咁嘅嘢. 我就係都要玩啲有對等嘅GAME. 咁先可以保障番我地啲普羅大眾~

Marco

feifei 提到...

銀行買賣紙黃金啲條約都好保護銀行本身...
粉紅色嘅重要提示...
http://www.whbhk.com/webpages/zh-hk/html/investment/gold/gold.html?id=inves_gold

匿名 提到...

多謝fei fei提供.

Marco

Unknown 提到...

非常同意!!!!d銀行緊係想sell大家買廢紙!!!!!

Gordon 提到...

等如買大細,開左式盅後,要通賠。但佢話技術問題呢局唔算,惡過何生。

Tamama 提到...

作為成年人, 有責任清楚那些投資產品的風險, 除了市場波動外, 還有發行機構的信用/誠信, 都是潛在風險之一, 投資前不得不留意 !!

亦需要知道發行機構往往在合約中說明它們擁有 "最終決定權", 換言之, 它們依理辦事是 "法外開恩", 不依理, 亦是道理之一啊 ....

目前除非全世界的投資者都聯合抵制這些機構開出的不平等條約, 否則, 我們這些小市民只能夠避之則吉 !!

satan_wong 提到...

銀行的確玩哂...

匿名 提到...

點處理高盛單野, 而家全世界都睇實, 港交所隨時兩面不是人!

匿名 提到...

"港交所隨時兩面不是人" 咁即係點? 2邊都唔討好?

Marco

匿名 提到...

唱開件事, 搞大佢, 遊行下~

平凡人