2010年12月3日 星期五

離奇假金事件之一

昨日下午突然收到電訊商發出的SMS,話香港出現假金,今日再睇新聞,各方都言之鑿鑿,更有假金的相片刊出,連電視台有都講,相信一定令到各位好擔心!

今次已經係年內第二次有相關報導,我覺得大家唔使擔心,因為成件事只可以用兩個字去形容,就係離奇,而且係「好離奇」!

離奇一:冇人報警!
根據各大報章講,受騙金行及金號只向同業的商會組織等匯報,並冇報警,《星島日報》更轉述海關發言人話,由2009年至今並未接過一間金舖或擋舖的舉報。既然假金問題如此嚴重,坊間收金店又如此盛行,竟然冇一間受騙的商號請警方或海關幫手調查,大家話奇唔奇?請警方調查又唔使錢,唔通商會及組織會幫手捉賊?自行發出指引叫會員小心檢查會好得過警方幫手查嗎?

唔報警,商會有解釋,今日《平果》報導:九龍珠石玉器金銀首飾業商會理事梁永強話,因為對方所賣之黃金只係成色不足,所以警方話對方冇賣假金,而係金行高估黃金成份,對方唔算犯法,所以會員金行冇再搵警方幫手。

其實根據香港黃金法令,只要金器與金器上或收據上寫明成色不附即屬違法,梁某唔係咁都唔知呀?定係來賣金器之人根本唔知成色?更冇收據,但金行都照收?如果係咁,就唔係人地有心欺騙,係金行自已唔小心。

因為世界各地的金器都有唔同成色,例如印度,好多金器的成色都唔夠,只有7至8成。人地由外地來香港賣,鬼知你一定要純金咩?拿來香港金行賣,你自已唔check清楚,就賴人地賣假金,成件事你話幾離奇?其實只要細心check清楚成色,咪照成色比例俾錢羅,五成就俾五成錢,七成就俾七成錢咪得羅,一分金就一分錢,呢方面金行可以購買驗金儀器幫手,錯不在賣金人。

離奇二:行騙成本高昂
根據各大報章講,假金中的真金成份由5成至9成不等,其餘則為其他金屬,如銥、鋅、鐵等,且是用極高科技製成,真假難分。換言之,要製造一件假金器成本最少是現金價的50%以上,騙人1000萬,單是買金成本就要500萬,再計埋其他金屬的成本,還有高科技製金的設備,再找人到金行行騙等等的成本,最後的利潤有多少?大家可以細心衡量下值唔值?我覺得用500萬買金等升值,其實化算好多!如果真金成份高達9成,大家話有冇可能?(資料來自168的SP兄)

究竟今次事件為乜?且看下回分解!

7 則留言:

Gordon 提到...

多謝,我上個星期剛剛係金舖買左條兩幾重的金鏈,俾呢單新聞嚇一嚇,不過,睇完你呢個分析,當堂釋除晒疑慮.
睇真D,淨係你個短訊已經浮誇啦,[高彷真度假金充斥本港金舖],充斥喎!呢個字係形容到好嚴重,其實冷靜D再睇晒成個事件,目的真係出晒面嚇D人唔好買實金.

Lisa 提到...

Gordon 說得有 point :)

i 提到...

潛台詞:"你睇,咁多假金,又唔知點去驗,咁麻煩,銀紙阿唔同哩,有哂水印檢真偽,重有啲錢放係銀行賬目上,又安全又方便,唔好攪咁多啦,玩吓股票算啦, 無謂偷偷雞不著蝕搾米la..."

i 提到...

噢,要玩金銀阿,有,GLD, SLV, PHYS gold ETF, gold silver cert., 全部跟貼哂個市價,無花無假,又有咁多 gold stocks....
我地香港人哩架麻,挑通眼尾,便有咁笨買舊野反屋企住哂架...

匿名 提到...

i:
你好像很小看這個網誌,我們支持買實金.

匿名 提到...

我地真係好多舊野係屋企架.支持實金!!!!!!

i 提到...

匿名 : 點解實金好哩? 送都無人要wor...

http://www.youtube.com/watch?v=WAaVK5AkZzI